ДУШАНБЕ, 8 июл — Sputnik. Артиши Русия бо мушакҳои баҳрии дақиқияташон баланд 2 маҷмааи соҳилии мушакафкани "Harpoon"-ро, ки Бритониёи Кабир ба Украина додааст, нобуд кард.
Ба иттилои Вазорати мудофиаи Русия дастгоҳҳои бритониёӣ дар вилояти Одесса мавриди зарба қарор гирифтаанд.
"Бо силоҳи баҳрии дорои дақиқияти баланд дар наздикии шаҳраки Лимани вилояти Одесса, 2 маҷмааи мушакии соҳилии "Harpoon", ки аз Британиёи Кабир оварда шудааст, нобуд карда шуданд", - омадааст дар иттилоия.
Инчунин дастгоҳи партоби мушакҳои "Точка-У" ва беш аз 150 сарбозу афсари украинӣ дар Донетск ҳадафи зарба қарор гирифтаанд.
Қаблан 2 дастгоҳи партоби мушакии навъи HIMARS-и амрикоӣ дар Донетск нобуд карда шуданд. Таъкид шуда буд, ки якҷоя бо ин маҷмааҳои низомӣ ҳамчунин ду анбори аслиҳаи низомӣ низ вайрон карда шудааст.
Пештар Иёлоти Муттаҳидаи Амрико аз интиқоли системаҳои мушакии чандкаратаи HIMARS ба Украина эълон карда буд, ба шарте ки онҳо барои зарба задан ба қаламрави Федератсияи Русия истифода нашаванд.
Вазорати умури хориҷии Русия эълон карда буд, ки интиқоли силоҳ ба Украина танҳо даргириҳои низомиро тӯл медиҳад, аммо ба бароварда шудани ҳадафҳои гузошташудаи амалиёт таъсире нахоҳад дошт.
Дар зимн мақомоти Русия борҳо таъкид намуданд, ки силоҳҳои интиқолии ғарбиро ба Украина ҳадафи қонунии зарбаҳои худ медонад.