ДУШАНБЕ, 28 июн — Sputnik. Дар Душанбе вохӯрӣ ва мулоқоти чандрӯзаи намояндагони Тоҷикистону Қирғизистон анҷом ёфт, хабар медиҳад Вазорати умури хориҷӣ.
Ба иттилои манбаъ, ҷаласаи навбатии гурӯҳҳои кории топографии ҳайатҳои Ҳукумати Тоҷикистону Қирғизистон оид ба аломатгузории марз баргузор гардид ва дар фарҷом як протоколи дахлдор ба имзо расид.
Вазорат аз баргузор шудани ин ҷаласа танҳо як хабари кӯтоҳ нашр намудааст ва ҷузъиёти бештарро ифшо накардааст.
Танҳо зикр шудааст, ки ҷаласа дар фазои дӯстона сурат гирифт ва интизор меравад, ояндаи наздик як ҷаласаи дигар дар Қирғизистон баргузор шавад.
Тоҷикистону Қирғизистон беш аз 980 километр марзи муштарак доранд, ки ҳоло танҳо ҳудуди 519 километри он муайян шудааст.
Ёдовар мешавем, ки баъд аз муноқишаи мусаллаҳонаи марзӣ дар рӯзҳои 28-29 апрели соли гузашта марзи миёни Тоҷикистон ва Қирғизистон аз 24 майи соли 2021 то ҳол бастааст.
Барои рӯй надодани чунин ҳодисаҳои фавқулодда гурӯҳҳои топографии ҳар ду ҷумҳурӣ оид ба тақсимоти сарҳад мунтазам вохӯрӣ мегузаронанд.