ДУШАНБЕ, 20 июн — Sputnik. Русия ва Донбасс дар амалиёти низомӣ ҳатман пирӯз мешаванд, шакке нест, изҳори боварӣ кард, мудири Хадамоти истихбороти хориҷии ФР, Сергей Наришкин.
Вай, ки ҳамчунин роҳбарии Ҷамъияти таърихии Русияро низ ба уҳда дорад, зимни ҷаласаи ин созмон гуфт, аҳолии Русияро ҷасорату истодагарии сокинони Донбасс мафтун кардааст, ки тайи 8 соли охир бо низоми Киев мубориза мебаранд.
"Инчунин якҷоя бо низомиёни Русия амалиёти озодсозиро анҷом дода истодаанд. Касе шубҳа надорад, ки пирӯзӣ насиби мо хоҳад буд", - изҳор дошт Наришкин.
Русия рӯзи 24 феврал амалиёти вижаро дар Украина оғоз кард. Кишвардори Русия Владимир Путин ҳадафи онро "ҳимояи одамоне номид, ки тӯли 8 сол аз сӯйи режими Киев мавриди таҳқиру наслкушӣ қарор гирифтаанд".
Барои ин, ба гуфтаи ӯ, дар назар аст, ки "нозизудоӣ ва ғайринизомикунонии Украина" анҷом шуда, тамоми масъулини "ҷиноятҳои хунини зидди мардуми осоишта" дар Донбасс ба ҷавобгарӣ кашида шаванд.
Аммо дар бораи ишғоли Украина сухане нест, таъкид кард раисҷумҳури Русия.
Дар айни замон қувваҳои мусаллаҳи Федератсияи Русия вазифаи асосии марҳилаи аввали амалиёти махсусро анҷом додаанд. Онҳо иқтидори ҷангии Украинаро ба таври назаррас коҳиш доданд. Ҳадафи аслӣ дар Вазорати дифоъ озодсозии Донбасс номида шуд.