ДУШАНБЕ, 15 июн — Sputnik. Ҳунармандони Сирки давлатии Тоҷикистон бо барномаи ҳунарӣ ба Ҷумҳурии Ӯзбекистон сафар намуданд. Дар ин бора дафтари матбуотии Вазорати фарҳанги Тоҷикистон хабар дод.
Ба иттилои манбаъ, ҳайати ҳунармандони Сирки давлатии Тоҷикистон аз 15 нафар ҳунарманди бомаҳорат иборат буда, аз 15 июн то 15 июл барои тамошобинони шаҳри Тошканд барномаи ҷолиби сиркӣ пешниҳод мекунанд.
Вазорат таъкид намуд, ки ҳунари сирки тоҷикро дар Ӯзбекистон Мастона Собирзода, Шокир Болтаев, Вафоҷон Иззатуллоев, Алмос Илёсов, Солеҳ Юсупов, Идибек Киромиддинов, Қурбоналӣ Ҳалимов, Шаҳноза Ҷабборова ва Анӯша Ҳусейнзода муаррифӣ мекунанд.
"Ҳунармандон дар намуди акрабатика, гимнастика, ромкунии ҳайвонот, эквилибристика баромад намуда, ҳунару истеъдоди худро ба мухлисону ҳаводорони сирк намоиш медиҳанд", - омадааст дар хабар.
Маврид ба зикр аст, ки қаблан сиркбозони тоҷик бо барномаи ҳунарӣ ба шаҳри Анталияи Туркия ва Покистон сафар карда буданд.
Он замон сафари ҳунармандони тоҷик бо даъвати Созмони Сайёҳии Ҷумҳурии Туркия сурат гирифта буд. Сиркбозони тоҷик дар чандин шаҳри Туркия ҳунарнамоӣ намуданд.