ДУШАНБЕ, 10 июн — Sputnik. Вализода Абдуқодир Исуф иҷрокунандаи вазифаи раиси ноҳияи Шаҳринав таъйин шуд.
Фармон дар ин бораро Эмомалӣ Раҳмон, раисҷумҳури Тоҷикистон 10 июн имзо кард.
Ба иттилои дафтари матбуотии раисҷумҳури Тоҷикистон, Вализода дар мақоми роҳбари ноҳияи Шаҳринав Ҷаббор Носирзодаро иваз намуд, ки бо сабаби ба кори дигар гузаштанаш барканор шудааст.
Вализода раиси нав дар Шаҳринав аз моҳи июни соли 2020 то моҳи ноябри соли 2021 роҳбарии шаҳри Кӯлобро ба уҳда дошт. Аз феврали соли 2018 то таъйин шуданаш ба роҳбарӣ дар Кӯлоб раиси шаҳри Турсунзода буд.
Бар асоси ҳолномаи расмӣ, Вализода 3 марти соли 1964 дар ноҳияи Ховалинг таваллуд шуда, солҳои 2006-2010 муовини раиси шаҳри Қурғонтеппа, солҳои 2010-2013 раиси ноҳияи Ховалинг, солҳои 2013-2018 ба ҳайси раиси ноҳияи Мир Сайид Алии Ҳамадонӣ кор кардааст.
Дар ҳолномаи Вализода инчунин омадааст, ки соли 1983 ӯ Техникуми политехникии шаҳри Душанбе ва соли 1996 Донишгоҳи аграрии Тоҷикистонро хатм карда, ихтисосаш муҳандиси хоҷагии қишлоқ, иқтисодчӣ мебошад. Мавсуф солҳои 1995-2000 корманди Комбинати орди ноҳияи Колхозобод ва солҳои 2000-2002 муовини аввали директори генералии иттиҳодияи "Ғалла"-и вилояти Хатлон буд.