Аз ҳафт вагони қатора якбора чаҳор вагон дар наздикии шаҳри Табас, 550-километр ҷанубу шарқтари Теҳрон, аз хатти ҳаракат берун шуд.
Бар асари ин фалокат 17 нафар ба ҳалокат расида, беш аз 50 мусофир ҷароҳат бардоштанд.
Вазъи 16 нафари захмишудаҳо дар бемористон вазнин арзёбӣ мешавад. Илова бар ин, боз панҷ нафари дигар бедарак шудаанд.
Теъдоди қурбониён метавонад афзоиш ёбад, зеро дар вақти фоҷиа дар дохили қатора ҳудуди 350 мусофир будаанд.
Якчанд дастаҳои наҷотдиҳӣ бо мошинҳои ёрии таъҷилӣ ва чархболҳо ба ҷои ҳодиса расидаанд.
Аз аксҳо дида мешавад, ки вагонҳои қатора чаппа шудаанд.
Тибқи иттилои пешакӣ, садамаи маргбор дар паи бархӯрди қтаора бо экскаватор рух додааст. Тафтишот оғоз шудааст.
Дар ҷои ҳодиса шаш бригадаи Ҷамъияти "Ҳилоли Аҳмар" кор мекунад. Амалиёти ҷустуҷӯ ва наҷотдиҳӣ идома дорад.