Аҳмадзода ба аёдати кӯдакони маъюб рафт - акс

Раиси вилояти Суғд ба хабаргирии кӯдакони маъюби шаҳри Хуҷанд рафта, ба онҳо ба муносибати Рӯзи байналмилалии ҳифзи кӯдакон туҳфа тақдим кард
Sputnik
ДУШАНБЕ, 31 май — Sputnik. Раиси вилояти Суғд Раҷаббой Аҳмадзода дар остонаи Рӯзи байналмилалии ҳифзи кӯдакон ба манзилҳои кӯдакони маъюб рафта, онҳоро аёдат кард.
Бино ба гузориши хадамоти матбуотии раиси вилоят, Аҳмадзода дар шаҳри Хуҷанд кӯдакони бемор Шукрулло Амирбекзода ва Мирҳабиб Мирмуҳаммедовро аёдат кардааст.
Сиёсатмадор онҳоро ба муносибати Рўзи байналмилалии ҳифзи кӯдакон табрик гуфтааст.
Раиси вилоят зимни аёдат гуфтааст, ки президент дар ҳамаи мулоқоту суҳбатҳояшон аҳли ҷомеаро ба анҷом додани амалҳои хайр ва ғамхорӣ нисбат ба табақаҳои ниёзманди аҳолӣ, аз ҷумла кӯдакону наврасони ятиму бепарастор ва бемор даъват намуда, дар таъмини ҳифзи иҷтимоии онҳо пайваста иқдомоти хайрхоҳона зоҳир менамояд.
Аҳмадзода ба аёдати кӯдакони маъюб рафт
Аҳмадзода таъкид кардааст, ки мақомоти вилоят кӯдакони ятиму бепарастор ва беморро пайваста мавриди таваҷҷуҳ қарор дода, ҳамасола кӯдакон аз оилаҳои камбизоат ва ятиму бепарасторро ба истироҳатгоҳҳо ҷалб менамояд.
"Ба беморону барҷомондагон низ мунтзам кумак расонида шуда, дар арафаву рӯзҳои ид хотири онҳо шод гардонда мешавад", - гуфтааст ӯ.
Манбаъ афзуда, ки Шукрулло Амирбекзода ва Мирҳабиб Мирмуҳаммедов ҳар ду ҳамчун маъюб ба қайд гирифта шуда, аз кумакҳои иҷтимоии давлат бархурдоранд.
Раиси вилоят ба наврасон туҳфаҳои худро супорида, ба онҳо саломативу хушиҳои рӯзгорро орзу кардааст.