ДУШАНБЕ, 30 май — Sputnik. Владимир Путин, раисҷумҳури Русия ва ҳамтои туркаш Раҷаб Тайиб Эрдуғон амалиёт дар Украинаро баррасӣ карданд.
Дар ин бора дафтари матбуотии раисҷумҳури Туркия хабар дода афзуд, ки Эрдуғон зимни суҳбат бо Путин пешниҳод кардааст, ки мулоқоти сеҷонибаи ҳайати Русия, Украина ва Созмони Милали Муттаҳид дар Истанбул гузаронда шавад.
Раисҷумҳури Туркия зарурат ба иқдомеро зикр намудааст, ки метавонад пайомадҳои бади ҷангро коҳиш диҳанду барои эҳёи сулҳу эътимод миёни Русия ва Украина мусоидат кунанд.
Ӯ омодагии ҷониби Туркияро барои иҷрои нақши нозир дар мулоқот дар сурати ризоияти ҷонибҳо баён доштааст. Эрдуғон гуфт, дар баробари раисҷумҳури Русия бо ҳамтои украинияш Владимир Зеленский низ суҳбати телефонӣ анҷом медиҳад ва аз ӯ даъват хоҳад кард, ки аз роҳҳои муколамаю дипломатия истифода намоянд.
Ин дар ҳолест, ки ахиран вазъи Украинаро президенти Русия телефонӣ бо президенти Фаронса, Эммануэл Макрон ва садри аъзами Олмон Олаф Шолтс низ баррасӣ кард.
Ба иттилои Кремл, раҳбари Русия дар бораи рванди амалиёти вижаи идомадошта муфассал маълумот дода қайд кард, ки нерӯҳои ФР меъёрҳои ҳуқуқи байналмилалии башардӯстонаро қатъиян риоя мекунанд.
Манбаъ афзуд, дар суҳбат ҳамчунин ба раванди музокирот, ки бо айби Киев қатъ шуда буд, таваҷҷуҳ карданд. Владимир Путин омодагии Русияро барои азсаргирии муколама баён кардааст.
Вай ҳамчунин ба масъалаи "хавфнок будани идомаи интиқоли силоҳҳои ғарбӣ ба Украина" ва хатарҳои марбут ба ноором кардани вазъ ва ташдиди буҳрони башардӯстона таваҷҷуҳ кардааст.
Роҳбарони кишварҳо ба мувофиқа расиданд, ки робитаҳоро идома диҳанд.