ДУШАНБЕ, 23 май — Sputnik. "Роспотребнадзор" ба хотири ҷилавгирӣ аз воридоти бемории сурхакони маймун ба Русия назорати санитариро дар марз пурзӯр кардааст.
Дар ин бора РИА "Новости" бо истинод ба котиботи ниҳоди мазкур хабар дод.
"Бо мақсади ҷилавгирӣ аз воридоти ин беморӣ ба қаламрави Русия "Роспотребнадзор" тадобири назорати санитарию карантиниро дар марз пурзӯр кардааст. Вазъият таҳти назорати доимии хадамот қарор дорад", - омадааст дар хабар.
Ҳамчунин ин ниҳод афзуда, ки феълан ягон мавориди вуруди ин беморӣ ба қаламрави Русия сабт нашудааст.
Эҳтимоли роҳ ёфтани сурхакони маймун ба Русияро мутахассисони "Роспотребнадзор" ночиз гуфтанд.
Ёдовар мешавем, қаблан Созмони Ҷаҳонии Беҳдошт хабар дода буд, ки теъдоди гирифторони бемории сурхакони маймун ба 92 нафар расидааст.
То 21 май СҶБ маълумот дорад, ки 92 ҳолати бемории сурхакони маймунро дар лаборатория тасдиқ кардааст. Дар ҳамин ҳол дар паём таъкид мешавад, ки онҳо дар кишварҳое сабти ном шудаанд, ки қаблан дар он ягон мавриди сироятшавӣ ба он сабт нашуда буд.
Маълум аст, ки ин беморӣ чанд ҳафта давом мекунад, аммо метавонад боиси мушкилот гардад.
Одамоне, ки бар зидди бемории сурхакони маймун ваксина шудаанд, аз ин вирус эмин хоҳанд буд, аммо эмкунии ҳатмӣ дар охири асри гузашта аз байн рафт.
Дар айни замон ҳолатҳои сирояти одамон дар як қатор кишварҳо, аз ҷумла Британияи Кабир, Шветсия, Италия, Фаронса, Австралия, Канада, Олмон, Нидерландия, Швейтсария ва Испания ба қайд гирифта шудаанд.