ДУШАНБЕ, 22 май — Sputnik. Ширкати IRS, ки масъулияти пулчиниву нигаҳдории шоҳроҳи Душанбе - Чаноқро бар уҳда дорад, мегӯяд, ҳоло роҳ танҳо барои мошини сабукрав боз аст.
Қаблан, ба далели омадани сел ва резиши санг ҳаракати тамоми намуди нақлиёт дар ин роҳ муваққатан баста шуд.
"Пас аз бартараф кардани пайомади селу сангрезӣ, ҳаракати нақлиёти сабук аз тариқи роҳи Душанбе - Чаноқ иҷозат дода шуд", - омадааст дар хабарномаи ширкат.
Зимнан, манбаъ хабар дод, ки дар наздиктарин фурсат гузариши автомобилҳои боркаш низ имконпазир мегардад.
Ёдовар мешавем, ки қаблан Оҷонсии ҳавошиносӣ ҳушдор дода буд, ки дар баъзе ноҳияҳои тобеъи ҷумҳурӣ, вилоятҳои Хатлону Суғд боридани борони шадид ва раъду барқ дар назар аст. Ин ниҳод боришоти жоларо низ пешгӯӣ карда буд.
Ҳамчунин хабар дода мешавад, ки то 23 май хатари фаромадани сел, болоравии сатҳи об дар рӯдхонаҳое, ки аз ҷануби қаторкӯҳҳои Ҳисор, аз ҷумла Яхсу, Қизилсу (ҷануб), Вахш, Зарафшон ва Исфара ҷорӣ мешаванд, дар назар аст.