ДУШАНБЕ, 19 май — Sputnik. Дар Ӯзбекистон қоидаҳои нави гузаронидани "Занги камолот" ҷорӣ шуд. Ин кишвар ба мисли Тоҷикистон доир кардани ин чорабиниро маҳдуд намуд.
Ба иттилои Вазорати маориф, ин ниҳод дар тамоми макотиби Ӯзбекистон қоидаҳои нави баргузор кардани чорабинии хайрбодӣ барои хатмкунандагонро пиёда намудааст.
Бар тибқи қоидаҳои нав, ҷамъоварии маблағ аз волидон, тақдими туҳфаҳои арзишманд ва зиёфат дар тарабхонаву қаҳвахона қатъиян манъ карда шуд.
Гуфта мешавад, "Занги камолот" дар тамоми мактабҳои Ӯзбекистон 25 май танҳо дар саҳни мактаб бидуни ҳузури меҳмонон ҳамагӣ 45 дақиқа сурат мегирад.
"Ба беҳтарин хатмкунандагон сипоснома тақдим мешавад", - омадааст дар хабари вазорат.
Бояд гуфт, ҳамаи ин маҳдудиятҳо дар Тоҷикистон ҳанӯз аз соли 2016 ҷориянд. Омили асосии манъ кардани "Занги камолот" ва "Иди Алифбо" -ро дар кишвар ба ҷилавгирӣ кардан аз амалҳои коррупсионӣ рабт дода буданд.
Ба ҳамин хотир дар макотиби Тоҷикистон ба ҷойи ин чорабинӣ мувофиқи ҷадвали корӣ хонандагон ба дарсҳо фаро гирифта мешуданд.
Инчунин дар соли 2010 дар мактабҳои Тоҷикистон таътилҳои тирамоҳию баҳориро низ манъ карда буданд, дар ҳоле муҳлати таътили зимистонаро дароз карданд. Сабаби ин норасоии қувваи барқ дар фасли сармо буд.
Аммо тирамоҳи соли 2018 таътилҳои тирамоҳию баҳориро барқарор намуданд.