ДУШАНБЕ, 26 апр — Sputnik. Дар чанд кӯча ва маҳаллаҳои шаҳри Хуҷанд интиқоли об муваққатан қатъ мегардад, хабар медиҳад "Sugdnews" бо истинод ба Корхонаи воҳиди давлатии "Хуҷандводоканал".
Маҳдудияти обтаъминкунӣ аз сабаби анҷоми корҳои таъмирӣ сурат мегирад.
"Дар ноҳияҳои алоҳидаи маркази маъмурии вилояти Суғд - шаҳри Хуҷанд интиқоли оби нӯшокӣ муваққатан қатъ шудааст", — омадааст дар хабар.
Ҳамин тавр, аз соати 8:00-и рӯзи 27 апрел ба далели таъмири истгоҳи "Нав" дар иншоотҳои обтаъминкунии "4", "4а" об қатъ мешавад.
Маҳдудиятҳо ба навоҳии соҳили рост - 1, 2, 4, 5, 8, 12, 13, 14, 15, 16, 17, 18, 19, кӯчаи 80-солагии Душанбе ва маҳаллаи Бешкапа дахл доранд.
Дар бораи замони азсаргирии интиқоли об то ҳол хабар дода нашудааст.
"Хуҷандводоканал" аз сокинони маҳаллаҳои дар боло зикргардидаи шаҳри Хуҷанд хоҳиш мекунад, ки оби ошомиданӣ захира кунанд.
Қаблан хабар дода шуда буд, ки сокинони маҳаллаҳои шаҳри Хуҷанд, соҳили рости дарёи Сир аз камбуди оби ошомиданӣ нигаронанд.
Ба гуфтаи шаҳрвандон, вақт ва суръати обрасонӣ хеле кам шудааст.