ДУШАНБЕ, 20 апр — Sputnik. Дар Суғд як сокини ноҳияи Бобоҷон Ғафуров ба 20 соли зиндони низомаш сахт маҳкум шуд, хабар медиҳад дафтари матбуотии Додситонии кул.
Ба гузориши манбаъ, номбурда ба далели даст доштан дар фавти ҳамсараш ва кӯдаки батни ӯ муттаҳам дониста мешавад.
Манбаъ меафзояд, сокини деҳоти Чашмасори ноҳияи Бобоҷон Ғафуров моҳи январи соли гузашта ҳамсари ҳомилаашро дар шароити хона ҷарроҳӣ кардааст.
Суди вилояти Суғд, парвандаи ҷиноятӣ нисбати Ҷангазиев Ваҳобҷон Норбоевичро бо моддаи 104, қисми 2, банди “д”-и КҶ Ҷумҳурии Тоҷикистон, ки тафтиши он аз ҷониби прокуратураи ноҳияи Б. Ғафуров ба анҷом расонида шуда буд, баррасӣ намуд.
"Занаш дар вазъи ҳомиладории муҳлати 39 ҳафта ба дарди шадиди бачадону шикам гирифтор гардида, аз ӯ ёрии таъҷилӣ мехоҳад, ӯро базудӣ ба таваллудхона набурда, қасди шахсан бо роҳи ҷарроҳӣ таваллуд кунонидани ҳамсарашро мекунад", - омадааст дар хабар.
Гуфта мешавад, мард бо истифода аз корди хоҷагӣ шиками занашро мебурад ва кӯдаку бачадонро мебарорад. Чун мебинад, кӯдак дар бачадон мурдааст, барои наҷоти занаш ҳам чораандешӣ накарда, боиси марги ахирӣ низ мешавад.
Нисбати падари хонавода бо моддаи 104, қисми 2, банди "д"-и Кодекси ҷиноятӣ парванда боз шуд ва суди вилояти Суғд гунаҳкор будани ӯро тасдиқ намуд. Ҳамин тариқ бо қарори суд номбурда ба 20 соли зиндон маҳкум шуд ва ҷазояшро дар колонияи ислоҳии дорои низомаш сахт сипарӣ мекунад.