ДУШАНБЕ, 19 апр – Sputnik. Семоҳаи аввали соли равон бо қатъи фаъолияти беш аз 7,3 ҳазор субъекти хоҷагидорӣ ҷамъбаст карда шуд.
Дар ин бора хабаргузории "Авесто" аз қавли Ожонси омори Тоҷикистон хабар додааст.
Ба иттилои манбаъ, аз миёни субъектҳои хоҷагидории фаъолияташон қатъшуда, 319 ададашон шахсони ҳуқуқӣ ва беш аз 7 ҳазорашон соҳибкорони инфиродӣ мебошад.
Таъкид шудааст, ки ба ҳолати аввали апрели соли равон дар ҷумҳурӣ 685,4 ҳазор субъектҳои хоҷагидорӣ ба қайд гирифта шудааст, ки аз ин 635 ҳазорашон соҳибкорони инфиродӣ мебошанд. Теъдоди субъектҳои фаъол ба ҳолати аввали апрели соли равон 344,5 ҳазор нафар мебошад.
Барҳамхӯрии субъектҳои хоҷагирдорӣ ва фаъол набудани бархеи онҳо дар ҳолест, ки ахиран Эмомалӣ Раҳмон, раисҷумҳури Тоҷикистон барои дастгирии соҳибкории хурду миёна дастур дод. Ӯ махсусан дар шароитии феълӣ, ки авзои ҷаҳонӣ мураккаб боқӣ мемонад, рушди соҳибкорию сармоягузорӣ ва афзоиши тавлидоти дохилиро муҳим хонд.
Дар ҳамин ҳол Вазорати рушди иқтисод ва савдои Тоҷикистон мегӯяд, ҳаҷми маҷмуи маҳсулоти дохилӣ нисбат ба ҳамин давраи соли гузашта 7,5 дарсад афзоиш ёфтааст.
Дар сохтори ММД дар семоҳаи аввал саноат (22,1%) ва савдо (19,6%) бартарӣ доранд. Ҳиссаи нақлиёт, алоқа ва анбор дар сохтори ММД 11,7% ва андоз 12%-ро ташкил додааст.
Саҳми соҳаи кишоварзӣ, ки дар охири сол одатан дар сохтори ММД бартарӣ дорад, дар семоҳаи аввал ҳамагӣ 6,4%ро ташкил додааст. Ин аз он вобаста аст, ки соли кишоварзӣ тоза шуруъ шудааст. ⠀
Тибқи пешгӯиҳо, дар соли ҷорӣ афзоиши ММД дар сатҳи 7,9%, ба маблағи 103,9 млрд. сомонӣ, муодили 8,3 млрд. доллар дар назар аст.