ДУШАНБЕ, 14 апр — Sputnik. Муносибатҳои душвори одамон аксаран ба манбаи муноқишаҳо дар марзи Тоҷикистону Қирғизистон табдил меёбанд.
Ин андешаро сиёсатшиноси тоҷик Шокирҷон Ҳакимов дар сӯҳбат бо Sputnik Тоҷикистон иброз дошт.
"Фикр мекунам, ки дар ҳарду кишвар нерӯҳои марказгурез вуҷуд доранд, ки дар ботлоқи омилҳои шахсӣ ё шаклҳои дохилӣ ғарқ шудаанд, онҳо мекӯшанд, ки номуносиб рафтор кунанд ва ин нодуруст аст", - гуфт ӯ.
Дар посух ба суол дар бораи вазъи кунунии манотиқи наздимарзӣ, Ҳакимов қайд кард, ки бо вуҷуди талошҳои дипломатӣ, эътирофот ва нерӯҳои марзбонӣ ҳамдигарфаҳмӣ надоранд.
Сиёсатшинос даъват кард, ки ин мушкил дар сатҳи президентҳои кишварҳо ҳал шавад, то мақомоти ҳифзи ҳуқуқ назоратро дар сатҳи олӣ эҳсос кунанд.
Ҳодисаҳои рӯзи 12 апрел боиси тааҷҷуби коршинос шудааст, зеро Тоҷикистон, ки барои ҳалли мусолиматомези масъала талош дорад, қурбониёни бештар дорад.
"Ҷониби Тоҷикистон ҳамеша дар лаҳзаҳои марбут ба додани қурбониён созиш мекунад, аммо ин натиҷа намедиҳад", - хулоса мекунад Ҳакимов.
Ёдовар мешавем, ки 12 апрел соати 18:20 дар ҳудуди хоҷагии деҳқонии ҷамоати деҳоти Зафари Хистеварз дар рӯ ба рӯи деҳаи Ҷан-Ҷери ҷамоати Кулундуи ноҳияи Лайлак тирпаронӣ рух дод.
Сабаби муноқишаи мусаллаҳона ҷанги лафзӣ миёни сардори отряди марзбонии Қирғизистон дар Кулунда ва марзбонони тоҷик будааст.
Гуфта мешавад, ки дар ин ҳодиса 6 нафар аз ҷониби Қирғизистон ҷароҳат бардошта, се марзбони тоҷик низ захмӣ шудаанд, ки ду нафари онҳо сангин захмӣ шудаанд.
Ҳамзамон ҷониби Тоҷикистон як қурбонӣ низ дар пай доштааст.