ДУШАНБЕ, 8 апр — Sputnik. Эмомалӣ Раҳмон, президенти Тоҷикистон бо раисҷумҳури Русия Владимир Путин суҳбати телефонӣ анҷом дод.
Дар оғоз сарони ду кишвар ба муносибати 30-солагии истиқрори муносибатҳои дипломатӣ миёни Тоҷикистон ва Русия ҳамдигарро табрик гуфтанд, хабар медиҳад дафтари матбуотии Эмомалӣ Раҳмон.
Зимни мулоқот президентҳо бо қаноатмандӣ ба сатҳи баланди муносибатҳои дуҷониба, ки бар пояи анъанаҳои нек ва эҳтироми байниҳамдигарӣ асос ёфтаанд, таъкид карданд.
"Дар ин зимн ҷонибҳо ҷараёни рушди афзояндаи робитаҳои ду кишварро дар соҳаҳои тиҷоративу иқтисодӣ ва фарҳангиву гуманитарӣ, ҳамчунин сатҳи кунунии ҳамкории Тоҷикистону Русияро дар соҳаи амниятӣ баланд арзёбӣ намуданд", - афзуд манбаъ.
Ба иттилои манбаъ, раванди рушди вазъият дар Афғонистон ва ҳолати сарҳади миёни Тоҷикистону Афғонистон аз мавзуоти дигари роҳбарони давлатҳо будааст.
Ҳамчунин Раҳмон ва Путин дар робита ба дигар масъалаҳои мубрами рӯзномаи байналмилалӣ ва минтақаӣ табодули афкор анҷом доданд.
Қаблан дар паёми шодбошияш Эмомалӣ Раҳмон гуфта буд, тайи се даҳсолаи равобит Маскаву Душанбе дар роҳи рушду таҳкими муносибатҳои дӯстии наздик ва ҳамкориҳои барои ҷонибҳо судманд дар чорчӯби шарикии стратегӣ ба натиҷаҳои назаррас ноил гардидаанд.
Президенти Тоҷикистон ҳамкориҳои дуҷонибаро дар ҳама сатҳҳо баланд арзёбӣ карда гуфт, рушди минбаъдаи ҳамаҷонибаи муносибатҳои Тоҷикистон ва Русия ҷавобгӯи манфиатҳои аслии шаҳрвандони кишварҳои мо буда, ба нигоҳ доштани сулҳу амонӣ дар Осиёи Марказӣ мусоидат менамояд.
Дар ҳамин ҳол Владимир Путин гуфт, тӯли даҳсолаҳои сипаришуда ба онҳо муяссар шуда, ки робитаҳои байни Русия ва Тоҷикистонро ба сатҳи шарикии стратегӣ ва иттиҳодии миёни ду кишвар бароранд. Муколамаи пурмазмуни сиёсӣ, ҳамкориҳои босамар дар соҳаҳои тиҷоративу иқтисодӣ, илмиву техникӣ ва гуманитарӣ дар ҳоли рушд қарор доранд.
Роҳбари Русия ҳамчунин изҳори бовар кардааст, ки тавсеаи минбаъдаи тамоми маҷмуи муносибатҳо байни Русия ва Тоҷикистон ҷавобгӯи манфиатҳои аслии мардумони бо ҳам дӯсти ду кишвар буда, дар маҷрои таҳкими сулҳу субот дар Осиёи Марказӣ қарор дорад.