ДУШАНБЕ, 3 апр — Sputnik. Ахиран дар вилояти Хатлон таҳти раёсати раиси вилоят Қурбон Ҳакимзода иҷлосияи даҳуми Маҷлиси вакилони халқи вилоят, даъвати шашум баргузор гардид.
Дар он яке аз масъалаҳои муҳим ин фаъолияти ду фурудгоҳи бузурги ин вилоят буд.
Дар ин ҷаласа ҳисоботи мудирони кулли Ҷамъияти саҳомии кушодаи “Фурудгоҳҳои байналмилалии Бохтару Кӯлоб” дар бораи рушди соҳаи авиатсияи гражданӣ дар вилоят шунида шуд.
Дар ин ҷаласа таъкид шуд, ки фаъолияти фурудгоҳҳои Бохтар ва Кӯлоб хуб буда, таъмиру азнавсозии ҷойи пазироӣ, таъсиси гӯшаҳои таблиғотӣ бо се забон: тоҷикӣ, русӣ ва англисӣ, хариди техникаҳои барои фурудгоҳ пешбинишуда аз фаъолияти назарраси онҳо бозгӯ мекунад.
Ҳамчунин дар ин ҷаласа муовини раиси вилоят Сулаймонзода Акрам иттилоъ дод, ки дар вилоят 368 лоиҳа ба маблағи зиёда аз 8 миллиард сомонӣ марҳила ба марҳила бояд амалӣ гардад.
Айни замон 62 лоиҳа бо азхудкунии 15,6 фоизи маблағҳо сурат гирифта, корҳо дар ин самт идома доранд.