ДУШАНБЕ, 22 мар — Sputnik. Таҳримҳо алайҳи Русия, ки Иёлоти Муттаҳида ҷорӣ кардааст, барои нигоҳ доштани пешвоии ҷаҳонии ин кишвар кӯмак намекунанд ва фосилаи байни Шарқу Ғарбро коҳиш намедиҳанд. Дар ин бора рӯзномаи "Wall Street Journal" менависад.
Муаллифи матлаб Уолтер Рассел Мид таъкид кард, ки ташаббусҳои давлатҳо ва шарикони онҳо дар Шарқ дастгирӣ намеёбанд.
"Набудани дилгармӣ дар миёни кишварҳои “ғайриғарбӣ” дар мавриди бархӯрди Амрико ба аъмоли раисҷумҳури Русия Владимир Путин падидаест, ки сиёсатмадорони амрикоӣ нодидааш мегиранд", - мегӯяд ин рӯзноманигор.
Вай қайд кард, ИМА ва ИА кӯшиш мекунанд, Чинро маҷбур созанд, ки алайҳи Федератсияи Русия маҳдудият ҷорӣ кунад, аммо онҳо ба муқовимати ин саркаш дучор меоянд.
Нуқтаи назари Пекин, ба таҳлилгари WSJ, Африқои Чанубӣ, Бразилия ва Ҳиндустону Ветнами содиқи Америка ҳамсон аст.
Рӯзноманигор пешниҳод кард, ҳар давлате, ки талабҳои Вашингтонро иҷро намекунад, дар назари он душман мешавад.
Идеяи истифодаи иқтисоди ҷаҳонӣ ҳамчун "силоҳ" раҳбарони бисёр кишварҳоро ба даҳшат меорад.
Мид аз таҳримҳои раиси пешини Кохи Сафед Доналд Трамп алайҳи Эрон ёдовар шуд. Чунин тадбирҳо шуури ҷомеаи байналмилалӣ дар бораи қувваеро, ки системаи иқтисодии ҷаҳонӣ ба ИМА медиҳад, боло мебарад.
Бисёре аз сиёсатмадорон бовар доранд, ИМА ба оқибатҳои қарорҳои сахти худ тоб оварда наметавонад, гуфт дар хотима ин таҳлилгар.
Ёдовар мешавем, ИМА ва Иттиҳодияи Аврупо ба далели амалиёти вижа барои ҳифзи Донбасс алайҳи Русия маҳдудиятҳои густарда ҷорӣ кардаанд. Таҳримҳо ба соҳаҳои молӣ, энергетика, нақлиёт, технология ва сиёсати раводид таъсир расониданд.