ДУШАНБЕ, 7 мар — Sputnik. Раисҷумҳури Русия Владимир Путин бо тасмими баргузории амалиёти вижаи низомӣ дар Украина Қримро аз ҳамлаи ногузири артиш ва гурӯҳҳои миллатгароёни украинӣ наҷот дод.
Дар ин бора РИА "Новости" бо истинод ба вакили Думаи давлатии Қрим Михаил Шеремет хабар дод.
Ба андешаи ӯ, раҳбари Русия "воқеан барои пешгирӣ кардан кор кардааст."
Зимнан мақомти ҶМД хабар доданд, ки дар қароргоҳи радикалҳои украинӣ асноде пайдо шудааст, ки аз нияти низомиён ва миллатгароён барои ҳамла ба Қрим ва Донбасс дар рӯзи 8 марти соли 2022 шаҳодат медиҳанд.
Дар навбати худ раиси Кумитаи тафтишоти Русия Александр Бастрикин дастур дод, ки ин маълумот тафтиш, инчунин дигар тадбирҳо андешида шаванд, ки дар натиҷа масъалаи оғоз кардани парвандаи ҷиноӣ ҳал шавад.
"Доктринаи низомии Украина баргардонидани назорат бар Қримро дар бар мегирад. Сухан танҳо дар замони иҷрои ин нақшаи ҷиноӣ буд", - таъкид кард вакил.
Русия рӯзи 24 феврал амалиёти низомӣ дар Украинаро оғоз кард. Путин ҳадафи онро "ҳимояи одамоне номид, ки дар тӯли ҳашт сол таҳти таъқиб ва наслкушӣ аз ҷониби режими Киев қарор гирифтаанд."
Ба ин манзур, ба гуфтаи ӯ, “ғайринизомисозӣ ва нозизудоии Украина”, таҳвили муҷримони ҷангии масъул дар “ҷиноёти хуношом алайҳи сокинони мулкӣ”-и Донбасс ба додгоҳ барномарезӣ шуд.
Бинобар баёнияи Вазорати дифои Русия, нерӯҳои ҳарбии ин кишвар танҳо зерсохтҳои низомию низомиёни Украинаро ҳадаф қарор медиҳанд ва ин амалиёт шаҳрвандони мулкиро таҳдид намекунад.
Бо ҳимояти нерӯҳои ҳавоии ФР ҳуҷуми гурӯҳҳои ҶХД ва ҶХЛ доман мегустарад. Ин ҷо ҳарф дар бораи забти Украина нест, гуфт раисҷумҳури Русия. Дар баробари амалиёт инчунин музокироти Русия ва Украина низ баргузор мешавад, ки то ҳол ду даври он анҷом ёфта, интизор меравад, рӯзҳои наздик даври сеюмаш сурат гирад.