ДУШАНБЕ, 4 мар — Sputnik. Намояндаи расмии Вазорати дифои Русия генерал-майор Игор Конашенков гуфт, нерӯҳои мусаллаҳи Русия дар ҷабҳаи васеъ пеш рафта, дар паҳлӯҳои ҳамшафат бо воҳидҳои Ҷумҳурии Донетск амал карда, маҳаллаҳои нави аҳолинишинро озод мекунанд.
"Воҳидҳои нерӯҳои мусаллаҳи Русия ҳамлаи худро дар ҷабҳаи васеъ идома медиҳанд. Дар паҳлӯҳои ҳамсоя бо воҳидҳои Ҷумҳурии Донетск амал карда, шаҳракҳои Пятихатки, Шевченково, Пология, Гусарка, Новоданиловка ва Шербаки таҳти назорат гирифта шуданд", - гуфт ӯ.
Намояндаи вазорати Русия афзуд, ки пулиси халқии ҶХД шаҳракҳои Шандриголово, Александровка, Дерилово, Средне ва Лозовоеро ишғол кардааст.
Дар навбати худ ҶХД Розовка, Труженка, Знаменовка ва Пузатоеро таҳти назорати худ гирифтааст.
Русия амалиёти низомӣ дар Украинаро субҳи барвақти 24 феврал шуруъ кард. Раисҷумҳури Русия Владимир Путин ҳадаф аз онро “ҳимояти мардуме, ки тӯли ҳашт сол аз тарафи режими Киев мавриди тамасхур ва наслкушӣ қарор доштанд”, унвон кард.
Ба ин манзур, ба гуфтаи ӯ, “ғайринизомисозӣ ва нозизудоии Украина”, таҳвили муҷримони ҷангии масъул дар “ҷиноёти хуношом алайҳи сокинони мулкӣ”-и Донбасс ба додгоҳ барномарезӣ шуд.
Бинобар баёнияи Вазорати дифои Русия, нерӯҳои ҳарбии ин кишвар танҳо зерсохтҳои низомию низомиёни Украинаро ҳадаф қарор медиҳанд ва ин амалиёт шаҳрвандони мулкиро таҳдид намекунад.
Бо ҳимояти нерӯҳои ҳавоии ФР ҳуҷуми гурӯҳҳои ҶХД ва ҶХЛ доман мегустарад. Ин ҷо ҳарф дар бораи забти Украина нест, гуфт раисҷумҳури Русия.
Дар баробари амалиёт инчунин музокироти Русия ва Украина низ баргузор мешаванд, ки то ҳол ду даври он анҷом ёфта, интизор меравад, рӯзҳои наздик даври сеюмаш сурат гирад.