ДУШАНБЕ, 25 фев — Sputnik. Садамаи нақлиётӣ дар роҳи мошингарди Душанбе - Кӯлоб - Хоруғ боиси марги кӯдаки 10-сола шуд.
Бино ба гузориши Вазорати корҳои дохилии Тоҷикистон, ин ҳодисаи нохуш нисфирӯзии 24-уми феврал, тахминан соати 13:00 рух додааст.
Гуфта мешавад, ки ронандаи худрави "Опел-Зефира", сокини 27-солаи ноҳияи Файзобод, ҳангоми ҳаракат дар роҳи Душанбе - Кӯлоб - Хоруғ аз уҳдаи идораи воситаи нақлиёт набаромадааст.
Дар ҳамин ҳол ронанда пиёдагарди ноболиғи 10-солаи сокини шаҳри Ваҳдатро пахш намудааст.
"Дар натиҷа ноболиғ ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст", - омадааст дар хабарнома.
Ҳамзамон Вазорати умури дохилии Тоҷикистон аз садамаи дигари нақлиётӣ хабар медиҳад, ки дар пайи он ронандаи трактор ҷон бохтааст.
Гуфта мешавад, ки ронандаи трактори тамғаи МТЗ-80, сокини 28-солаи ноҳияи Ш. Шоҳин ҳангоми ҳаракат дар роҳ, дар наздикии деҳаи Чорчашмаи ноҳияи мазкур бинобар сабаби зиёд будани барф лағжида, ба чуқурии 10-метрӣ чаппа шудааст.
Дар натиҷа ронандаи трактор дар ҷойи ҳодиса ба ҳалокат расидааст.
ВКД мегӯяд, дар робита ба ҳодисаҳои мазкур таҳқиқот идома дорад.