ДУШАНБЕ, 24 фев — Sputnik. Дабири кулли СММ Антониу Гутерриш хостори хатми фаврии низоъ дар Украина шуд.
"Ин низоъ бояд фавран хотима дода шавад", - изҳор дошт Гутерриш.
Дабири кулли СММ Антониу Гутерриш гуфт, дар пасманзари ҳаводиси кунунӣ дар Донбасс ғамгинтарин лаҳзаи фаъолияти касбии ӯ фаро расидааст.
Дабири кулли СММ Антониу Гутерриш аз раисҷумҳури Русия Владимир Путин даъват кард, ки нерӯҳояшро ба Русия баргардонад ва аз бадтарин ҷанг дар Аврупо аз аввали асри ҷорӣ ҷилавгирӣ кунад.
"Президент (Владимир) Путин, ба номи инсоният, нерӯҳои худро ба Русия баргардонед. Ба номи инсоният, нагузоред, ки ҷанги бадтарин аз ибтидои аср дар Аврупо оғоз ёбад", - гуфт Гутерриш ба хабарнигорон.
Ба гуфтаи ӯ, низоъҳои васеъмиқёс бо оқибатҳои харобиовар на танҳо барои Украина ва ҳамчунин барои Русия низ фоҷиабор хоҳанд буд.
Ӯ гуфт: "Мо ҳатто пешгӯӣ карда наметавонем, ки он чӣ тавр ба иқтисоди ҷаҳонӣ таъсир хоҳад расонд".
Ёдовар мешавем, кишвардори Русия Владимир Путин дар паёми навбатии худ аз тасмими анҷом додани амалиёти низомӣ дар Донбасс хабар дод. Роҳбари Русия гуфт, масъалаи хунрезӣ дар ин кишвар ба дӯши ҳукумати феълии Украина хоҳад буд.
Ӯ дар паёми худ аз низомиёни украинӣ даъват намуд, ки дастурҳои ҷиноии мақомотро иҷро накунанд ва баръакс силоҳи худро ба замин гузоранд.