ДУШАНБЕ, 22 фев — Sputnik. Раисиҷумҳури Русия Владимир Путин пас аз эътирофи ҷумҳуриҳои худхондаи Донетск ва Луганск бори аввал изҳори назар кард.
Президент дар суҳбат бо ҳамтои озарии худ Илҳом Алиев таъкид намуд, ки муносибатҳои хуби Маскав ва Киев соли 2014, аснои табадуллоти давлатӣ дар Украина ба зарбаи сахт мувоҷеҳ шуданд.
Путин афзуд, ки Русия дар ҳама ҳолатҳои шадид хеле эҳтиёткорона амал мекард ва манфиатҳои тамоми кишварҳоро ба инобат мегирифт.
"Мутаассифона, пас аз табаддулоти давлатӣ дар Украина мо чунин сатҳ ва сифати ҳамкорӣ бо Украинаро намебинем, он аз байн рафтааст. Мехоҳам таъкид намоям, ки ин пас аз табаддулоти давлатӣ ва ғасби ғайриқонунии қудрат аз ҷониби онҳое, ки ин корро анҷом додаанд, рӯй дод", - гуфт Путин.
Фармонҳо дар бораи эътирофи ҷумҳуриҳои худхондаи Донетск ва Луганск ба унвони кишварҳои соҳибихтиёр ва мустақил шаби 21 ба 22 феврал, пас аз ҷаласаи ғайринавбатии Шӯрои амният, ки вахомати авзоъ дар шарқи Украинаро баррасӣ карданд, нашр шуданд.
Ёдовар мешавем, Владимир Путин, кишвардори Русия шоми 21 феврал ба мардуми кишвар паёми изтирорӣ ироа кард.
Дар изҳороти худ раҳбари давлат гуфт, ки Федератсияи Русия ҶХД ва ҶХЛ-ро расман эътироф мекунад.
Ӯ ҳамчунин хостори қатъи хунрезӣ дар Украина шуд.
Путин изҳори итминон кард, ки тасмим дар бораи ба расмият шинохтани ҷумҳуриҳои худхондаи Донетск ва Луганск аз тарафи шаҳрвандони Русия дастгирӣ хоҳад шуд.