ДУШАНБЕ, 13 фев — Sputnik. Карим Гулмуродзода, ноиби вазири молияи Тоҷикистон далели боло рафтани маҳсулоти ниёзи аввал дар ҷумҳуриро ба тағйирёбии қурби пул рабт дода, додани сабукиҳо барои воридоти ин навъи мол аз хориҷро муҳим хонд.
Ба иттилои нашрияи парлумонии "Садои мардум", Гулмуродзода ин нуктаро ҳафтаи равон зимни баррасии тағйирот ба Қонуни буҷаи соли 2022 баён дошт.
Ноиби вазири молия таъкид намуд, ки дар Тоҷикистон барои воридоти орд, нуриҳои минералӣ ва сӯзишворӣ сабукӣ дода мешавад. ки барои муътадил нигоҳ доштани нархи молу маҳсулот мусоидат мекунад.
Ӯ омореро ироа намуд, ки Тоҷикистон чӣ қадар дар бозори молҳои муҳим маҳсулоти худӣ дорад ва чӣ қадарро ворид месозад.
Аз ҷумла ӯ гуфт, соли 2021 воридоти гандум 1 миллиону 28,1 ҳазор тонна, шакар 101,1 ҳазор тонна, орд 56,7 ҳазор тонна, рӯғани рустанӣ 92,6 ҳазор тонна, биринҷ 30,8 ҳазор тонна, карбамид 88,6 ҳазор тонна, селитра 40,6 ҳазор тоннаро ташкил додааст.
"Соли сипаришуда истеҳсоли гандум дар ҷумҳурӣ 876,1 ҳазор тонна, орд 828 ҳазор тонна, рӯғани рустанӣ 23,5 ҳазор тонна, биринҷ 17,6 ҳазор тонна, гӯшт 67,7 ҳазор тоннаро ташкил дод", - афзуд Гулмуродзода.
Бар асоси тағйироти пешниҳодкардаи ҳукумат, ки парлумон қабул намуд, воридоти маҳсулоти ниёзи аввал, аз қабили орду гандум, сӯзишворӣ ва нуриҳои минералӣ аз сӯйи Агентии захираҳои моддии давлатӣ бидуни пардохти андоз аз арзиши иловашуда, боҷи гумрукӣ ва аксиз сурат мегирад.
Ғиёсиддин Ашӯрзода, узви узви Кумитаи Маҷлиси намояндагон дар бахши иқтисод ва молия гуфт, ин сабукиҳо ба Агентии захираҳои моддии давлатӣ имкон медиҳад, ки аз ҷониби агентӣ маҳсулоти озуқа, сӯзишворӣ ва нуриҳои минералӣ аз хориҷи кишвар бе мамониат ворид ва бо нархҳои нисбатан дастрас ба аҳолӣ пешниҳод шаванд.
"Ворид намудан ва ба фурӯш баровардани молу маҳсулоти озуқа боиси нигоҳдории нархҳо дар бозори дохилии ҷумҳурӣ гашта, ба иқтисоди кишвар низ таъсири мусбат мерасонад", - изҳор кардааст вакил дар ҷаласа.
Таъкид шудаст, ки номгӯ ва ҳаҷми маҳсулотро Ҳукумати Тоҷикистон муайян хоҳад кард.