ДУШАНБЕ, 10 фев — Sputnik. Беш аз 5000 ҷангҷӯ дар қаламрави Афғонистон, дар наздикии марз бо Тоҷикистон мутамаркиз шудаанд.
Дар ин бора раиси Ситоди муштараки СПАД Анатолий Сидоров зимни як нишасти хабарӣ иттилоъ дод.
"Дар наздикии марзи давлатӣ бо Тоҷикистон беш аз 40 пойгоҳ ва лагерҳои омӯзишӣ мавҷуд аст, ки дар онҳо беш аз 5 ҳазор ҷангҷӯ, аъзои гурӯҳҳои мухталифи террористӣ таҷаммуъ кардаанд", — гуфт сардори ситоди СПАД.
Вай афзуд, дар айни замон толибон артиши муқаррарии иборат аз тақрибан 150 000 нафарро ташкил медиҳанд. Ба гуфтаи ӯ, созмонҳои байналмилалии ғайридавлатӣ мегӯянд, дар ин кишвар маводи ғизоӣ, колоҳои зарурӣ, камбуди доруворӣ ва нарасидани мутахассисони варзида дар ҳама бахшҳо низ мушоҳида мешавад.
Номбурда гуфт, созмонҳои башардӯстона тахмин мезананд, ки беш аз 23 миллион шаҳрванди Афғонистон дар зимистони соли 2022 бо норасоии шадиди ғизо рӯ ба рӯ хоҳанд шуд ва беш аз 3 миллион кӯдак гуруснагӣ хоҳанд дошт.
Қаблан раисҷумҳури Тоҷикистон Эмомалӣ Раҳмон аз кишварҳои Осиёи Марказӣ даъват карда буд, ки барои ҳифзи марз бо Афғонистон муттаҳид шаванд.
Ба гуфтаи ӯ, ҳифзи марз бо Афғонистон ҳамкориҳои густурдаи кишварҳои тамоми минтақаро тақозо мекунад.
Ӯ ҳамчунин хостори таъсиси "камарбанди амниятӣ" дар атрофи Афғонистон шуд, зеро дар ин кишвар амалиёти ҷангҷӯёни созмонҳои мухталифи террористӣ шиддат мегирад.
Вазири дифои Русия Сергей Шойгу гуфт, бесуботии сиёсӣ дар Афғонистон хатари вуруди террористон ва афзоиши қочоқи маводи мухаддир дар кишварҳои Созмони Паймони Амнияти Дастаҷамъиро афзоиш медиҳад.
Тӯли марзи Тоҷикистону Афғонистон 1344,15 километрро ташкил медиҳад.