ДУШАНБЕ, 26 янв – Sputnik. Маҷидӣ Бахтиёр Саидаҳмадзода аз вазифаи раиси шаҳри Гулистони вилояти Суғд барканор шуд. Ӯ ки як соли пеш ба ин мақом таъйин гардида буд, бо фармони Эмомалӣ Раҳмон, раисҷумҳури Тоҷикистон 26 январ барканор ва ҳамзамон вазифаи нав гирифт.
Дар бораи ин таъйиноти кадрӣ дафтари матбуотии раисиҷумҳур иттилоъ дод.
Дар ҷараёни таъйиноти кадрӣ Маҷидӣ мудири кулли Корхонаи муштараки Тоҷикистону Канада - "Апреловка" дар шаҳри Гулистон таъйин гардид.
Номбурда қудои Раҷаббой Аҳмадзода, раиси вилояти Суғд буда, дубора ба мақоми қаблии худ дар коргоҳи тавлидотии “Апреловка”-и шаҳри Гулистон баргаштааст.
Маҷидӣ Бахтиёр Саидаҳмадзода, 18 июни соли 1968 дар ноҳияи Панҷ дар оилаи зиёӣ таваллуд шудааст.
Соли 1996 Донишгоҳи политехникии Тоҷикистонро бо ихтисоси муҳандиси мошинҳо ва дастгоҳҳои саноати бофандагӣ ва ҳамчунин соли 2011 Донишгоҳи кӯҳӣ -металлургии Тоҷикистонро бо ихтисоси муҳандиси саноати кӯҳӣ хатм кардааст.
Таҳсилкардаи Академияи хизмати давлатии назди президенти Федератсияи Русия мебошад. Ӯ фаъолияти меҳнатиашро аз соли 1985 оғоз намуда, то соли 1995 ба ҳайси сардори шуъба дар ҶСК "Темурмалик" кор кардааст.
Соли 1996 директори ҶДММ “Бахтиёр” буд. То соли 1999 дар корхонаи муштараки “Апреловка” аз нозир то вазифаи сармеханик фаъолият намудааст. Соли 2020 як дафъа директори генералии ин корхона таъйин шуда буд. Аз 18 ноябри соли 2020 раиси шаҳри Гулистон таъйин гардид.
Ҳоло бо фармони раисиҷумҳур аз ин мақом барканор ва дубора мудири кулли “Апреловка” шудааст.
Мавсуф вакили Маҷлиси вакилони вилояти Суғд ва шаҳри Гулистон буда, бо медали “Хизмати шоиста” қадрдонӣ шудааст.