ДУШАНБЕ, 23 янв — Sputnik. Расмӣ Ҷабраилов, коргардон ва ҳунарпешаи хидматнишондодаи Русияи шӯравӣ дунёро дар синни 89-солагӣ падруд гуфт.
Дар ин бора Театри академии Маскав ба номи Маяковский дар саҳифааш дар шабакаҳои иҷтимоӣ хабар дод. Дар мавриди сабаби марг чизе гуфта нашудааст, танҳо зикр гардидааст, ки Ҷабраилов муддати тӯлонӣ бемор буд.
"Ҳамдардиямонро барои тамоми наздикони ҳунарманд баён мекунем. Барои ҳамаи кормандони театри Маяковский ин даргузашт талафоти ҷуброннопазир мебошад", - омадааст дар иттилоияи театр.
Ҳамкорони Ҷабраилов инчунин аз ҳунари ӯ тавсиф кардаанд, ки нақшҳои гуногуни мусбату манфиро хеле ҷаззобу табиӣ меофарид.
Расмӣ Ҷабраилов 8 декабри соли 1932 дар деҳаи Кассумкенти Доғистон таваллуд шуда, соли 1955 факултаи ҳунарпешагии ГИТИС ва соли 1961 факултаи коргардониро хатм намудааст. Аз соли 1961 давоми ду сол Ҷабраилов дар "Тоҷикфилм" ба ҳайси коргардони дуюм фаъолият намудааст.
Аз соли 1993 ҳунарпешаи "Иттиҳоди актёрҳои Таганка" ва аз соли 2002 узви тими Театри академии Маскав ба номи Маяковский будаст.