ДУШАНБЕ, 22 янв — Sputnik. Дар Тоҷикистон мавориди сироятёбӣ ба коронавирус бештар шудааст, хабар медиҳад Вазорати тандурустии Тоҷикистон.
Ба иттилои манбаъ, шабонарӯзи гузашта 36 ҳолати нави гирифторӣ ба коронавирус миёни шаҳрвандон сабт гашт.
Ин нишондиҳанда нисбат ба як рӯзи қабл 13 нафар зиёд мебошад.
Пас аз наздик ба се моҳи хомӯшӣ рӯзи 21- уми январ Вазорати тандурустии кишвар аз мубталошавии 23 тан ба коронавирус гузориш дод.
Ин ниҳоди мушаххас накардааст, ки оё навъи омикронии коронавирус, ки дар кишварҳои ҳамсоя пайдо шуд, миёни гирифторони нав дар Тоҷикистон ҳаст ва ё на.
Дар маҷмуъ, аз аввали бақайдгирӣ то имрӯз дар кишвар 17154 нафар гирифторони сирояти COVID-19 ба қайд гирифта шуда, аз ин шумора то санаи зикргардида 16971 нафар шифо ёфтаанд.
Ҳамчунин табибон ҷони 124 бемори COVID -19-ро наҷот дода натавонистанд.
Вазорати тандурустӣ хотиррасон мекунад, ки дар шароити паҳншавии босуръати бемории COVID-19 яке аз роҳҳои асосии пешгирии паҳншавии ин беморӣ эмгузаронӣ мебошад.
Тибқи тавсияҳои Ситоди оперативӣ оид ба мубориза бар зидди COVID-19, талабот барои вуруд ба кишвар сахттар шудааст.
Ҳамаи шаҳрвандони ба ҷумҳурӣ воридшуда барои пешгирии паҳншавии коронавирус аз ташхиси иловагӣ мегузаранд.
Суръати эмгузаронии ахолӣ низ зиёд карда шуд. Ҳамзамон табибони ҷумҳурӣ вояи сеюми ваксинаи зидди коронавирусро мегиранд.