ДУШАНБЕ, 18 янв — Sputnik. Ширкати IRS, ки ба пулҷамъкунӣ ва нигоҳдории роҳи Душанбе - Чаноқ машғул аст, аз боз шудани ин масир гузориш дод.
Ба иттилои ин ширкат, тармаҳои сершумор, ки аз субҳи 17-уми январ дар роҳи Душанбе - Чанок фаромада буданд, аз ин ҷода рӯфта шуданд.
Гуфта мешавад, ҳоло танҳо ҳаракат аз самти Хуҷанд ба Душанбе оғоз гардидааст.
"Кормандони филиали ширкат талош доранд, то дар наздиктарин фурсат гузариши нақлиёт аз ҳар ду ҷониб имконпазир гардад",- афзуд манбаъ.
Манбаъ мегӯяд, барои роҳандозии ҳаркат кормандон кулли шаб низ барфи роҳро тоза карданд.
Ҳаракат дар ин масир барои тамоми намуди воситаҳои нақлиёт беш ду рӯзи охир масдуд буд. Ширкати роҳбон ин ҳолатро ба номусоидии бодуҳаво рабт дода, таъкид намуд, ки дар роҳ тармаҳои зиёд фуруд омадаанд.
"Ҳамоно дар роҳҳои Душанбе - Хуҷанд, Душанбе - Рашт, Душанбе - Сангвор, Душанбе - Лахш, Кӯлоб - Дарвоз, Ванҷ - Хоруғ, Хоруғ - Ишкошим, Хоруғ – Мурғоб хатари лағзиши тармаву резиши санг боқӣ мондааст", - ҳушдор дод Кумитаи ҳолатҳои фавқулоддаи кишвар.