Дар пайи боз шудани марзҳои заминӣ ва ҳавоии Эрон бо Афғонистон садҳо шаҳрванди Афғонистон ҳамарӯза барои дарёфти раводиди Эрон дар назди сафорати ин кишвар дар Кобул ҷамъ мешаванд.
Аксари нафароне, ки мехоҳанд раводиди Эронро ба даст биёранд, ҷавононе мебошанд, ки пас аз фурӯпошии низоми пешин дар кишвари худ ба идомаи таҳсил ва кор умед надоранду барои идомаи таҳсил ё кор мехоҳанд ба Эрон раванд.
Ёдрас менамоем, ахиран Созмони Миллали Муттаҳид аз ҷомеаи ҷаҳонӣ даъват намуд, ки ба Афғонистон кумаки фаврӣ расонанд, вагарна шаҳрвандони ин ҷумҳурӣ бидуни кумак зинда намемонанд.
Хадамоти матбуотии созмони мазкур мегӯяд, имсол бояд ба кишвари ҷангзадаи Афғонистон 4,4 миллиард доллар ихтисос дода шавад. Ин маблағ барои 22 миллион шаҳрванди дохили Афғонистон ва ҳамчунин 5,7 миллион афғонистониҳое, ки берун аз Ватан қарор доранд, масраф мешавад.
Манбаъ меафзояд, 23 миллион нафарро хатари гуруснагӣ таҳдид мекунад.