ДУШАНБЕ, 5 янв — Sputnik. Пойгоҳи ҷадид барои мутобиқшавии муҳоҷирон дар Русия мусоидат мекунад, хабар дод Вазорати умури дохилӣ.
Ба иттилои манбаъ, пойгоҳ барои ташаккули гуруҳҳои касбӣ аз ҳисоби шаҳрвандони хориҷӣ пешбинӣ шудааст, ки барои кор ба минтақаҳои гуногуни Русия мераванд.
Дар сомона иттилооти гуногун дар бораи созмонҳое ҷамъ оварда шудааст, ки дар самти мутобиқсозии иҷтимоӣ ва фарҳангии хориҷиён дар Русия фаъолият доранд.
Инчунин пойгоҳ суроғаю телефонҳои марказҳои кумак ба муҳоҷиронро ба ниёзмандон пешниҳод мекунад. Муҳоҷирон метавонанд, аз тариқи ин сомона рақами телефонҳои боварӣ, замимаҳои мобилӣ ва дигар маводи заруриро пайдо кунанд, машваратҳои ройгони олайнӣ гиранд.
Дар бахшҳои дигар инчунин сомонаю пайвандҳои саҳифаҳои гуногуни иҷтимоӣ пешниҳод мегарданд, ки иттилооти муҳим барои шаҳрвандони хориҷиро дар бар мегиранд.
Тавассути додаҳои фароҳамшуда, муҳоҷирон метавонанд донишҳои иловагӣ дар бораи соҳаи меҳнат, қонунҳои Русия, назари коршиносон ва дигар маълумотро пайдо намоянд.
Дар бахши "кумак ба муҳоҷирон" суолу масъалаҳое гузошта мешаванд, ки шаҳрвандони хориҷӣ метавонанд дар Русия дучори он гарданд. Дар ин бахш ҳамчунин посух ба суолҳо ва тавсияҳои зарурӣ ба муҳоҷирон пешниҳод мегарданд.