ДУШАНБЕ, 30 дек — Sputnik. Нақшаи даромади буҷаи давлатӣ дар вилояти Суғд тайи 11 моҳи соли равон панҷ дарсад бештар иҷро гардид.
Ба иттилои дафтари матбуотии ҳукумати Суғд, аз январ то аввали декабр ба буҷаи давлатӣ 3 миллиарду 501,9 миллион сомонӣ ворид шуд, ки аз нақша 169,2 миллион сомонӣ зиёд аст.
Манбаъ афзуд, ба буҷаи маҳаллии вилоят 2 миллиарду 191,5 миллион сомонӣ ворид шудаст, ки 105,4 фоизи нақшаро ташкил медиҳад.
Таъкид шудааст, ки инчунин лоиҳаҳои қисми даромад барои соли 2022 ва қисми хароҷоти буҷаи вилояти Суғд барои соли 2022 муаррифӣ шуд.
Дафтари матбуотии ҳукумати Суғд, аз қавли сардори Сарраёсати молияи вилоят Анвар Мирзозода иттилоъ дод, ки қисми даромади буҷаи вилоят дар соли оянда се миллиарду 528 миллион сомонӣ пешбинӣ шудааст.
Ин дар ҳолест, ки дар қонуни қабулшудаи буҷа барои соли 2022 қисмати хароҷот 33 миллиарду 626,7 миллион сомонӣ ва даромади буҷа 33 миллиарду 2,8 миллион сомонӣ тасдиқ шудааст.