ДУШАНБЕ, 21 дек — Sputnik. Президенти Тоҷикистон Эмомалӣ Раҳмон кишоварзони кирмакпарварро аз пардохти андоз ба муҳлати 10 сол озод кард.
Дар ин бора раисҷумҳур зимни ироаи паёми солонааш ба парлумон хабар дод.
Ӯ гуфт, кирмакпарварӣ ва умуман кишоварзӣ солҳои охир дар тамоми ҷаҳон қариб аз байн рафтааст ва барқарор кардани он дар Тоҷикистон барои пайдо шудани ҷойҳои нави корӣ зарур аст.
"Замини тутзорҳо ба муддати 10 сол аз пардохти андози ягонаи замин, инчунин, шахсони ҳуқуқие, ки ба коркарди пилла ва истеҳсоли матоъҳои шоҳӣ, атласу адрас ва дигар маснуоти бофандагии дастӣ машғуланд, аз пардохти андозҳо пурра озод карда шаванд", - эълон кард кишвардор.
Президент таъкид кард, ки дар ин росто, махсусан барои бонувони кишвар дар манзили зисташон ҷойҳои нави корӣ пайдо мешавад.
Дар ин росто президенти кишвар ба масъулини дахлдор ва бавижа, Вазорати саноат супориш дод, ки дар доираи панҷсолаи рушди саноат (солҳои 2022-2026) масъалаи рушди кирмакпарвариро дар кишвар бозбинӣ намуда, ҳамаи камбудиҳои ҷойдоштаро бартараф кунанд.