ДУШАНБЕ, 19 дек — Sputnik. Интизор меравад, 6 январ қуръакашии мусобиқаи интихобии Ҷоми футзали Осиё - 2022 барпо гардад.
Федератсияи футболи Тоҷикистон мегӯяд, пас аз қуръакашӣ рақибони мунтахаби Тоҷикистон маълум мешаванд. Қуръакашӣ дар шаҳри Куала-Лумпур баргузор мешавад.
Манбаъ меафзояд, дастаи мунтахаби футзали Тоҷикистон таҳти раҳбарии сармураббӣ Пайрав Воҳидов дар минтақаҳои муттаҳидшудаи марказӣ ва ҷанубии мусобиқаи интихобии Ҷоми футзали Осиё-2022 бозӣ мекунад. Ин мусобиқа аз 1 то 15 апрели соли оянда баргузор хоҳад шуд.
Аз рӯи натиҷаҳои қуръакашии мусобиқаи интихобӣ, дар минтақаҳои муттаҳидшудаи марказӣ ва ҷанубӣ ду гурӯҳи иборат аз чордастаӣ ташкил карда мешавад.
Мавриди зикр аст, ки дастаи мунтахаби Тоҷикистон дар сабади дуюм дар баробари дастаи мунтахаби Қирғизистон ҷой гирифт.
Бар асоси натиҷаи марҳилаи интихобӣ, аз минтақаи ҷанубӣ ва марказӣ ба финали Ҷоми футзали Осиё-2022, ки аз 25 сентябр то 20 октябри соли 2022 дар Кувейт баргузор мешавад, аз ҳар гурӯҳ ду дастаи беҳтарин роҳ меёбанд.