ДУШАНБЕ, 30 ноя — Sputnik. Зиёзода мегӯяд, барои рушди соҳаи кишоварзӣ, дастгирии соҳибкорӣ ва ҷалби бештари сармоя ба комплекси агросаноатии ҷумҳурӣ як қатор имтиёзҳои тарифию андозӣ пешниҳод гардиданд,
Вазир 30 ноябр зимни гузориш дар ҷаласаи ҳукумат изҳор дошт, ки барои соҳаи кишоварзӣ 14 имтиёзи фискалӣ пешбинӣ шудааст, ки ин зиёда аз 13 фоизи шумораи умумии имтиёзҳои давлатиро дар бар мегирад.
Манбаъ афзуд, дар натиҷаи тадбирҳои андешидашуда воридоти сармояи умумии хориҷӣ ба соҳа дар соли 2020 нисбат ба соли 2019 ҳудуди 16, 9 миллион доллари амрикоӣ афзоиш ёфт.
"Дар соли 2020 воридшавии сармоягузории мустақим дар соҳаҳои парвариши зироат, сабзавоткорӣ, боғпарварӣ 11,3 миллион ва парвариши паранда 285 ҳазор доллари амрикоиро ташкил дод", - илова намуд дафтари матбуотии раисҷумҳури Тоҷикистон аз қавли Сулаймон Зиёзода.
Манбаъ афзуд, ки дар солҳои 2019-2021 барои рушди соҳаи кишоварзӣ аз буҷаи давлатӣ дар доираи барномаҳои соҳавӣ 74, 5 миллион сомонӣ ва аз тариқи лоиҳаҳои сармоягузории давлатии хориҷӣ 66,7 миллион доллар масраф шудааст.
Кишвардор Эмомалӣ Раҳмон мақомоти кишварро барои беҳтар намудани фазои сармоягузорӣ дар соҳаи кишоварзӣ ва рушди тиҷорати ин соҳаи ҷумҳурӣ муваззаф карда, таъкид намудааст, ки аз натиҷаҳо ба ҳукумат гузориш дода шавад.