ДУШАНБЕ, 28 ноя — Sputnik. Темур Раҳимов барои медали биринҷӣ бо паҳлавони Русия зӯрозмоӣ карда, пирӯз гардид. Бо ҳамин ҷудокорони Тоҷикистон аз "Abu Dhabi Grand Slam 2021" бо се мадал - ду биринҷӣ ва як нуқра бармегарданд.
Пештар дар ин мусобиқа Темур Раҳимов бар ду ҳарифаш пирӯз шуда, аз як нафар шикаст хӯрда буд.
Комроншоҳ Устопириён, ҷудокори дигари шинохтаи Тоҷикистон дар мусобиқаи "Abu Dhabi Grand Slam 2021" соҳиби медали нуқра гардид.
Ӯ дар даври ниҳоӣ дар вазни то 90 кило аз тарафи ҳарифаш Мансур Лорсанов, намояндаи Русия шикаст хӯрда, аз медали тило маҳрум шуд.
Қабл аз ин Устопириён ҷудокорон аз Британия, Амрико ва Қирғизистонро шикаст дода буд.
Паҳлавони дигари тоҷик Ҷаҳонгир Маҷидов дар зӯрозмоӣ барои медали биринҷӣ бо паҳлавони қирғиз Эрлан Шеров вориди майдон шуда, пирӯз берун омад.