ДУШАНБЕ, 23 ноя — Sputnik. Дастаи ҷавонони Тоҷикистон "Oogway Comics" ба даври ниманиҳоии "Space Apps Challenge 2021", ки аз ҷониби NASA баргузор мешавад, роҳ ёфт.
Писарону духтарони точик ба руйхати 37 командаи пурзуртарин дохил шуданд. Ва танҳо 10 нафари беҳтарин ба феҳристи ниҳоӣ роҳ меёбанд. Ғолибон имконият пайдо мекананд, ки ба ИМА сафар карда, дар раванди ба фазо парвоз кардани ракета иштирок кунанд.
Ба иттилои сафорати ИМА дар Тоҷикистон, номи ғолибони озмун моҳи декабри соли 2021 эълон хоҳад шуд.
Дар доираи озмун дастаи "Oogway Comics" вазифаи сохтани “астероидҳои моҳирона равшаншуда” бар душ гирифта, як китоби комикс ва барномаи мобилиеро таҳия кард, ки ба ҷавонон дар бораи Миссияи "Люси"-и NASA барои омӯхтани астероидҳои троянӣ (боқимондаҳои системаи офтобӣ ) маълумот медиҳад.
“Мақсади асосии лоиҳаи мо ба тамошобинон расонидани паёмест, ки ҳар як шахс ба таври худ беназир аст ва агар онҳо ба он бовар кунанд ва ба сӯи он бираванд, комилан метавонад ба ҳама гуна ҳадафҳои худ бирасанд. Бартарии асосӣ дар он аст, ки мо ин паёми созандаро дар шакли илмӣ пешниҳод мекунем”, - омадааст дар шарҳи лоиҳа дар вебсайти озмун.
Ҳайати даста аз чаҳор сокини ҷавони Душанбе: Тимур Шарифов, Малика Очилова, Баҳодур Ишонхоҷаев ва Шероз Ҷӯраев иборат аст.
Ёдовар мешавем, ин аввалин роҳёбӣ ба даври ниманиҳоии озмуни бонуфузи NASA барои намояндагони Тоҷикистон аст.