ДУШАНБЕ, 17 ноя — Sputnik. Ҳукумати ВМКБ мегӯяд, ноиби аввали раиси вилоят Низом Мирзозода бо корҳои соҳилмустаҳкамкунӣ дар ноҳияи Рушон шинос шудааст.
Ба иттилои манбаъ, зимни боздид маълум гардид, ки сокинони деҳаи Поҷвари Ҷумҳурии Афғонистон бо маблағгузории шарикони рушд садде сохта истодаанд, ки барои соҳили тарафи Тоҷикистон хатар дорад.
Таъкид шудааст, ки ин сад барои Тоҷикистон хатари аз байн бурдани зиёда аз 140 гектар заминҳои корами обии деҳаҳои Дерзуд, Барзуд ва Баррӯшони ноҳияи Рӯшонро ба миён меорад.
"Инчунин эҳтимолияти шусташавии роҳи байналмилалии Хоруғ - Душанбе, зери об мондани як адад фермаи чорводорӣ , 20 адад хонаи истиқоматӣ, базаи логистикии Агентии захираҳои моддии давлатии назди президенти Тоҷикистонро ба вуҷуд меорад", - омадааст дар иттилоия.
Ҳукумати ВМКБ таъкид намуд, ки ноиби аввали раиси вилоят аз корҳои сохтмонӣ эроди ҷиддӣ гирифта, барои бартараф намудани камбудиҳо ва вусъати корҳои соҳилмустаҳкамкунӣ ба масъулин супориш додааст.
Дафтари матбуотии ҳукумати ВМКБ илова намуд, ки иҷрои корҳои соҳилмустаҳкамкунӣ таҳти назорати мақомоти вилоятӣ гирифта шуд.