ДУШАНБЕ, 17 ноя – Sputnik. Курсии раиси ноҳияи Мастчоҳи вилояти Суғд баъди даргузашти Тоҳир Азиззода ду моҳ ба ин тараф холӣ буд ва акнун бо фармони президент Ализода Аъзам иҷрокунандаи раиси ноҳияи мазкур таъйин шуд.
Фармони таъйини Ализодаро сомонаи президенти Тоҷикистон низ нашр кардааст.
Бино ба иттилои дарёфтӣ, Ализода Аъзам Наврӯз 29 октябри соли 1982 дар деҳаи Арсовити ноҳияи Мастчоҳ таваллуд шуда, хатмкардаи мактаби рақами №26 мебошад.
Соли 1999 ба Донишгоҳи давлатии Хуҷанд ба номи академик Бобоҷон Ғафуров дохил шуда, риштаи молия ва қарзи онро хатм намудааст.
Ӯ фаъолияти кориашро соли 2003 аз вазифаи мутахассиси ҶДММ СТБ-"Инвестбонк"-и ноҳияи Бобоҷон Ғафуров шуруъ намуда, солҳои 2004-2005 сардори шуъбаи қурби асъор дар ин ширкати молӣ будааст.
Аз соли 2005 то соли 2010 дар ҶСК "Аввалин бонки молиявии хурд" дар шаҳри Хуҷанд фаъолият намудааст.
Ализода солҳои 2010-2016 сардори Маркази хидматрасонии бонкии "Миллениум" буд. Аз соли 2016 то соли 2018 ӯ ба ҳайси муовини молии мудири ҶДММ "Истиқлол ва КО"-и шаҳри Хуҷанд низ фаъолият кардааст.
Номбурда аз соли 2018 то имрӯз сардори Раёсати Кумитаи бехатарии озуқавории назди Ҳукумати Ҷумҳурии Тоҷикистон дар вилояти Суғд буд.
Ализода Аъзам Наврӯз писари Наврӯз Валиев, раиси шуъбаи минтақаии Бонки миллӣ дар шаҳри Хуҷанд аст. Ӯ донандаи хуби забонҳои русӣ ва англисӣ мебошад. Олидор соҳиби ду фарзанд аст.