ДУШАНБЕ, 12 ноя — Sputnik. Рушди захоири об дар Тоҷикистон ба таъмини кишварҳои минтақа бо нерӯи барқ мусоидат хоҳад кард, гуфт Қоҳир Расулзода, нахуствазири Тоҷикистон.
Расулзода зимни суханронӣ дар ҷаласаи Шӯрои сарони ҳукуматҳои кишварҳои ИДМ аз иқтидори ғании энергетикии Тоҷикистон ёдовар шуд.
"Бо дарназардошти омилҳои тағйирёбии иқлим истифодаи захираҳои обии Тоҷикистон ба таъмини кишварҳои минтақаи Осиёи Марказӣ бо нерӯи барқи аз ҷиҳати экологӣ тоза мусоидат мекунад", - гуфт сарвазири ҷумҳурӣ дар ҷаласаи видеоконфронсии сардорони давлатҳои иттиҳод.
Ҳамчунин, ба гуфтаи ӯ, Тоҷикистон ба рушди ҳамкориҳои байналмилалӣ барои беҳбуди вазъи экологӣ ҳам дар кишвар ва ҳам дар кишварҳои ИДМ аҳамияти хос зоҳир мекунад.
Қобили зикр аст, ки ҳоло Тоҷикистон ҳудуди 98 дарсади нерӯи барқро дар нерӯгоҳҳои барқи обӣ тавлид мекунад ва аз рӯи истифодаи нерӯи сабз дар ҷаҳон дар ҷои шашум қарор дорад.
Эмомалӣ Раҳмон, раисиҷумҳури Тоҷикистон зимни суханронӣ дар нишасти обу иқлим дар Глазго гуфт, ки ба далели тағйири иқлим талабот ба обу нерӯи барқ дар ҷаҳон афзоиш меёбад.
Раҳмон ёдовар шуд, ки тағйири иқлим ба иқтисоди ҷаҳонӣ таъсири ҷиддӣ мерасонад.
Президент ҳамчунин ба обшавии сареи пиряхҳо дар ҷумҳурӣ ишора кард, ки ба назари ӯ, боиси коҳиши захираҳои оби ҷаҳон мегардад.