ДУШАНБЕ, 10 ноя — Sputnik. Дар Порис иҷлосияи 41-уми Конфронси кулли ЮНЕСКО дар бораи масъалаҳои маориф, илм ва фарҳанг баргузор шуд. Дар ин маросим Одре Азуле дигарбора ба вазифаи мудири кулли ташкилот интихоб гардид.
Тоҷикистонро дар ин ҳамоиш вазири умури хориҷӣ Сироҷиддин Муҳриддин намояндагӣ кард. Ӯ дар ҳошияи ин чорабинӣ бо мудири кулли ЮНЕСКО Одре Азуле дидору мулоқот кард, хабар медиҳад ВУХ Тоҷикистон.
Дар ин дидор вазир ба сатҳи муносибатҳои гуногунҷанбаи Тоҷикистон бо ЮНЕСКО баҳои баланд дода, паёми табрикии кишвардорро ба ӯ расонд.
"Мавсуфро аз номи роҳбарияти олии Ҷумҳурии Тоҷикистон ба муносибати интихоб гардиданаш ба мансаби мудири кулли ин созмон ба муҳлати дуюм бо изҳори дастёбӣ ба комёбиҳои нави касбӣ табрику таҳният гуфт", - омадааст дар хабар.
Аз аксҳое, ки ВУХ Тоҷикистон нашр кардааст, дида мешавад, ки ба хонум Азуле як гулдастаи бузург иборат аз гулҳои садбарги гӯлобӣ, гарданбанди сафеди бо гулҳои чакан дӯхташуда ва нигорае тақдим карданд.
Сироҷиддин Муҳриддин бо Мудири кулли ЮНЕСКО Одрӣ Азуле
© ВУХ Тоҷикистон
Манбаъ афзуда, ки ҷониби Тоҷикистон ба мудири кул барои мусоидат дар баргузорӣ ва иштироки бевосита дар якҷоягӣ бо Президенти Тоҷикистон дар чорабинии бошукӯҳи Рӯзи фарҳанги Тоҷикистон дар ЮНЕСКО (14 октябри 2021) арзи сипос намуд.
Сироҷиддин Муҳриддин бо Мудири кулли ЮНЕСКО Одрӣ Азуле
© ВУХ Тоҷикистон
Муҳриддин баҳри расидан ба дастовардҳои нави ҳамкориҳои Тоҷикистон дар кулли самтҳои мавриди таваҷҷуҳи созмон изҳори умедворӣ кард.