ДУШАНБЕ, 10 ноя — Sputnik. Замоне ки сарбории системаи тандурустӣ дар робита ба бемории коронавирус сабук шавад, СҶБ эҳтимол поёни пандемияро эълон кунад. Дар ин бора мудири дафтари аврупоии СҶБ Ҳанг Клюге ба рӯзномаи "La Vanguardia" хабар додааст
"Мо бояд бо ковид зиндагӣ карданро ёд гирем. Ҳамин ки системаи тандурустӣ аз беморону ҳолатҳои фавт аз коронавирус сабук шуд, пандемия ба эндемия (мавҷудияти доимии касалии сироятӣ дар минтақа) табдил меёбад.
Ба гуфтаи ӯ, тибқи "баҳодиҳии одилонаи муътамад", то моҳи феврали соли оянда, агар тамоюли паҳншавии сироят тағйир наёбад, дар минтақаи Аврупо бар асари ин беморӣ боз ним миллион нафари дигар мефавтад.
Номбурда далели бидуни ҳал мондани ин мушкилиро ба ҷараёни сусти моякӯбӣ рабт дод.
Дар идома ӯ зикр намуд, ки агар қаблан мушкили асосӣ мавҷуд набудани ваксин буд, ҳоло ин мушкилӣ ҳал шуд, аммо мардум намехоҳанд аз он истифода баранд, "зеро ба ҳар гуна маълумоти бардурӯғ бовар мекунанд.
Пандемияи коронавирус ҳамоно дар ҷаҳон доман задааст ва дар аксари кишварҳо вазъият ҳамоно нигаронкунанда боқӣ мондааст.
Дар Тоҷикистон пас аз чанд ҳафтаи бидуни ковидӣ, шабонарӯзи гузашта ду ҳолати нав сабт гардид. Вазорат бо нашри омори нав изҳор дошт, ки дар 24 соати ахир ду бемори коронавирус шифо ёфт. Ба эҳтимоли зиёд ин ду нафар бемороне ҳастанд, ки рӯзи 15 октябр вазорат аз мариз шудани онҳо хабар дода буд.