ДУШАНБЕ, 9 ноя — Sputnik. Ҳайати ҳукумати толибҳо, аз ҷумла вазирони умури хориҷӣ, молия ва иқтисод рӯзи 10-уми ноябр ба Покистон мераванд.
Абдулқаҳҳор Балхӣ, намояндаи Вазорати умури хориҷии Афғонистон хабар додааст, ки ҳайат таҳти роҳбарии вазири хориҷӣ Амирхон Мутаққӣ дар шаҳри Исломобод густариши ҳамкориҳоро баррасӣ мекунад.
Таъкид шудааст, ки ҳайат инчунин Мулло Ҳидоятуллоҳ Бадрӣ, вазири молия ва Нуриддин Азизӣ, вазири тиҷорати ҳукумати навро низ шомил мешавад. Азизӣ соҳибкор аз вилояти Панҷшер аст, ки ахиран ба ҳайси вазири тиҷорат таъйин гардид.
Ба иттилои Абдуқаҳҳор Балхӣ, намояндагони баландпояи толибҳо бо ҷониби Покистон масъалаҳои таҳкими ҳамкориҳои иқтисодӣ, ҳамлу нақл, мушкили гурезаҳо ва содасозии убури марзро ба миён мегузоранд.
Ин дар ҳолест, ки ба гуфтаи Замир Кобулов, фиристодаи махсуси раисҷумҳури Русия дар умури Афғонистон, 11 ноябр дар Исломобод ҷаласаи "Сегонаи тавсеаёфта" барои баррасии вазъи Афғонистон баргузор мегардад.
Дар ин ҳамоиш иштироки намояндагони Русия, Чин, ИМА ва Покистон дар назар аст.