ДУШАНБЕ, 6 ноя — Sputnik. Бар асоси нақшаи пешбинишуда, дар Тоҷикистон беш аз 2 миллиону 710 ҳазор нафар алайҳи вируси COVID-19 ваксина гирифтааст.
Дар ин бора Вазорати тандурустӣ хабар дода, қайд намудааст, ки то 4 ноябри соли ҷорӣ 46,5 фисади шаҳрвандони мамлакат алайҳи ин беморӣ ваксина гирифтанд.
Манбаъ меафзояд, то санаи зикргардида ба 1 миллиону 161 ҳазору 995 нафар ё 37,1 фисади аҳолӣ вояи дуюм тазриқ шудааст. Ҳамчунин дар шаҳри Душанбе аллакай 100,4 дарсад иммунизатсияи аҳолии пойтахт иҷро гардидааст.
Вазорат таъйид намудааст, ки сокинони ҷумҳурӣ ҳамоно баҳри ҳифзи саломатии худ ва наздиконашон ба марказҳои саломатӣ рафта, ваксина мегиранд.
Тибқи қарори Ситоди ҷумҳуриявии мубориза бо коронавирус, ки санаи 3 июл ба нашр расид, ваксинаи зидди коронавирус барои шаҳрвандони аз 18-сола боло ҳатмӣ мебошад.
Дар ҳамин ҳол ин ниҳод аз шаҳрваноне, ки то ҳол ваксина нагирифтаанд, даъват намудааст, ки ҳатман ба муассисаҳои наздиктарини тандурустӣ муроҷиат намоянд ва аз тариқи ройгон моякӯбӣ шаванд.