ДУШАНБЕ, 2 ноя — Sputnik. Дар Тоҷикистон то ҳол масъалаи ваксиназании кӯдакон бар зидди коронавирус баррасӣ нашудааст. Дар ин бора сомонаи "Авеста" бо истинод ба сардори Раёсати амнияти санитарию эпидемиологӣ оид ба ҳолатҳои изтирорӣ ва ёрии таъҷилии тиббии назорати тандурустӣ Наврӯз Ҷаъфаров хабар дод.
Ба гуфтаи ӯ, тибқи талаботи Созмони Ҷаҳонии Беҳдошт, масъалаи эмкунии кӯдакон бар зидди коронавирус танҳо пас аз эмкунии беш аз 60 дарсади аҳолии калонсол матраҳ мешавад.
Наврӯз Ҷаъфаров зикр намудааст, ки то 1 ноябр 2 миллиону 700 ҳазору 548 нафар ё худ 46,4 дарсади аҳолии калонсоли кишвар алайҳи коронавирус моякӯбӣ шудаанд.
Миқдори дуюми ваксинаи COVID-19-ро то санаи зикршуда 2 миллиону 150 ҳазору 542 нафар ё 36,9 фоизи аҳолӣ гирифтааст.
Маврид ба зикр аст, ки ваксиназанӣ дар Тоҷикистон ҳамоно идома дорад.
Аҳолии кишвар 5 намуди ваксинаҳои зидди COVID-19 мегирад, ки инҳо "CoronaVac", "AstraZeneca", "Moderna", "Pfaizer" ва "Спутник V" мебошанд.