ДУШАНБЕ, 31 окт — Sputnik. Намояндагии Вазорати меҳнат, муҳоҷират ва шуғли аҳолии Тоҷикистон дар Русия аз шаҳрвандони ҷумҳурӣ – муҳоҷирони корӣ ва аъзои оилаи онҳо хоҳиш кардааст, ки дар ҳолати ҳодисаҳои нохуш фавран ба мақомоти марбутаи Русия ва намояндагиҳои Тоҷикистон дар ин кишвар муроҷиат намоянд.
Манбаъ шарҳ додааст, ки агар узви оила ва пайвандони муҳоҷири корӣ, ки дар Русия қарор доранд, бедарак гарданд, зарур аст, ки онҳо фавран ба шуъбаи минтақавии пулиси маҳалли иқомати худ муроҷиат намоянд.
“Муроҷиаткунанда ҳуҷҷатҳои тасдиқкунандаи шахсият, ҳуҷҷатҳои тасдиқкунандаи шахсияти бедаракшуда, маълумоти мухтасар дар бораи ҷоийи зист, ҷойи кор, наздикону пайвандон, ҳамкорон, дӯстон ва маълумот дар бораи симои зоҳириву охирон маълумот дар бораи шахси бедаракшуда, рақами мобилӣ ва расми рангаи онро бояд бо худ дошта бошад”, - таъкид доштааст манбаъ.
Ҳамзамон манбаъ илова кардааст, ки агар бедаркашуда шаҳрванди Тоҷикистон бошад, пайвандон ва хешу ақрабои ӯ бояд ба консулии сафорати Тоҷикистон дар Русия, намояндагии Вазорати меҳнат, муҳоҷират ва шуғли аҳолии Тоҷикистон дар ин кишвар барои мусоидат ва саривақт пайдо намудан муроҷиат намоянд.
Намояндагӣ зикр кардааст, ки агар маҳалли бедаракшавии шаҳрванд дар минтақаҳои Русия бошад, вобаста ба макони ҷойгиршавии худ шаҳрвандон метавонанд ба консулгарии генералии Тоҷикистон муроҷиат намоянд.
“Дар баробари ин дар Русия ташкилотҳои волонтёрӣ барои пайдо намудани шаҳрвандони бедаракшуда кӯмак менамоянд, ки наздикони бедаракшуда метавонанд вобаста ба ҷойи истиқомат муроҷиат намоянд”, - таъкид кардааст манбаъ.
Намояндагӣ ёдовар шудааст, ки дар ҳолатҳои пайдо гардидани маълумоти иловагӣ дар ба шахси бедаракшуда ва пайдо гардидани он дар ҷойи истиқомат ва ё макони муайяни пайвандону наздикон муроҷиаткунанда вазифадор аст, ки мақомоти марбутаро аз пайдо шудани шахси бедаркшуда огоҳ намояд.
Намояндагӣ ба муҳоҷирони меҳнатӣ тавсия додааст, ки ҳангоми ба ҷойи кор рафтан ва ё дар ҳолатҳои берун аз корӣ шаҳрванд ҳатман бояд бо худ ҳуҷҷати тасдиқкунандаи шахсият (шиноснома) ва иҷозатномаи фаъолияти меҳнатӣ (патент) дошта бошанд.