ДУШАНБЕ, 28 окт — Sputnik. Се куштигирӣ тоҷик дар Қаҳрамонии ҷаҳон миёни ҷавонони то 23-сола иштирок мекунанд, хабар медиҳад Кумитаи миллии олимпӣ.
Ба иттилои ин ниҳод, Қаҳрамонии куштии ҷаҳон миёни ҷавонони то 23-сола аз 1 то 7 ноябр дар шаҳри Белгради Сербия баргузор мегардад.
Ин мусобиқа аз рӯи равияҳои тарзи озод, юнонӣ-римӣ ва гуштини бонувон сурат мегирад, ки ҳудуди 620 варзишгар аз 58 давлатро дарбар мегирад.
Тоҷикистонро дар ин мусобиқа Муҳаммад Икромов, Мустафо Ахмедов дар куштии тарзи озод ва Далер Ризозода дар куштии юнонӣ-римӣ намояндагӣ мекунанд.
Манбаъ меафзояд, тибқи барнома, қаҳрамонӣ 1-уми ноябр бо қувваозмоиҳои куштии юнонӣ-римӣ (ЮР) оғоз мегардад.