ДУШАНБЕ, 21 окт - Sputnik. Яке аз ҳамкорони марҳум дар таъйиди ин хабар ба Sputnik Тоҷикистон гуфт, Раҳматтуллоев як ҳафта қабл бар асари шиддати фишорбаландӣ, ғайриинтизор дучори сактаи мағзӣ гардиду дар бемористон бистарӣ шуд.
"Ҳафтаи гузашта дар ҳолати кома қарор гирифтанд ва дар беморхонаи шаҳрӣ бистарӣ карда шуданд, бо ҳамин дигар ба барнахестанд ва имрӯз ҷон ба Ҳақ супурданд. Аз марги нобаҳангоми Раҳматуллоев мо, ҳамкорон андуҳгин ҳастем", - гуфт ҳамкори марҳум.
Бахтиёр Раҳматуллоев 23 майи соли 1967 дар шаҳри Хуҷанд, дар оилаи зиёӣ таваллуд шудааст.
Ӯ соли 1989 Омӯзишгоҳи мусиқи, Коллеҷи санъати кунунии шаҳри Хуҷандро хатм намуда, фаъолияти кориашро аз ҳамон сол дар дастаи эстрадаи рақсии "Шабнам" ҳамчун роҳбари мусиқӣ оғоз намудааст.
Марҳум соли 2004 роҳбари бадеии ансанбли "Садои Суғд"-и Раёсати фарҳанги вилоят таъйин мегардад.
Аз моҳи майи соли 2008, яъне аз рӯзи ташкили Муассисаи фарҳангии давлатии Кохи ба номи Абуабдуллоҳ Рӯдакӣ он ҷо истихдом шуда, то лаҳзаи вопасини умраш ҳамчун роҳбари бадеии ин маркази фарҳангӣ фаъолият мекард.
Раҳматуллоев соли 2009 ба унвони Аълочии фарҳанги Ҷумҳурии Тоҷикистон сарфароз шудааст.
Инчунин вай бо дипломи Ҳунарпешаи беҳтарини эстрадаи вилояти Суғд аз ҷониби Вазорати фарҳанг қадрдонӣ гардидааст. Қарор аст, пагоҳ, соати 11 ҷанозаи ин ҳунарманд ба хок супурда шавад.