ДУШАНБЕ, 17 окт — Sputnik. Кормандони полис беш аз 100 шаҳрванди хориҷиро дар сохтмони маҷмааи анбор дар Истра боздошт карданд. Дар ин бора шабакаи телевизионии "360" бо истинод ба "ВАО -и Вазорати корҳои дохилӣ" хабар дод.
Раёсат қайд кард, ки бархе аз муҳоҷирон дар Русия ғайриқонунӣ ба сар мебурданд ва бархе бо патент барои кор мушкилот доштанд.
Ҳангоми санҷиш, муҳоҷирон натавонистанд ҳуҷҷатҳои заруриро ба кормандони ҳифзи ҳуқуқ пешниҳод кунанд.
Гуфта мешавад, ин тафтиш ғайринақшавӣ буд ва аз он на корфармоён ва на коргарон дарак доштанд. Зимнан, аксар муҳоҷироне, ки аз рӯи ҳуҷҷатгузорӣ мушкилӣ доштанд, хостанд рӯ ба гурез ниҳанд, аммо кормандони ҳифзи ҳуқуқ нагузоштанд, ки онҳо паноҳ баранд.
"Ҳар яки онҳо дар маҳзани маълумот дарҳол тафтиш карда шуданд. Сипас ташхиси коргарон аз коронавирус гирифта шуд", - таъкид гардид дар хабар.
Манбаъ меафзояд, ҳар як муҳоҷире, ки ба нақзи қонун даст задааст, ҷаримабандӣ шуд.
Ёдовар мешавем, ки мақомоти Русия борҳо эълом кардаанд, нисбати хориҷиёне, ки ҳуҷҷатҳои зарурӣ надоранд, аз чораҳои сахт истифода мекунанд. Барои муайян кардани чунин шаҳрвандон дар минтақаҳои кишвар мунтазам санҷишҳо гузаронида мешаванд.