ДУШАНБЕ, 13 окт — Sputnik. Агар аъзои гурӯҳҳои муташаккили ҷиноятӣ танҳо сар бардоранд, ҳамон замон пора - пораашон мекунем, гуфт раиси Кумитаи давлатии амнияти миллӣ Қамчибек Тошиев дар ҷаласаи Жогорку Кенеш.
Бино ба гузориши Sputnik Қирғизистон, ҳамчунин дар ин ҷаласаи порлумон сохтор ва ҳайати ҳукумати нав баррасӣ мешавад.
Тошиев дар ин ҳайат бо нигоҳ доштани мақоми раиси Кумитаи давлатии амнияти миллии Қирғизистон муовини сарвазир хоҳад шуд.
Ба гуфтаи ӯ, дар шимол ва ҷануби кишвар "мафияҳои алоҳида вуҷуд доранд".
"Яке дузди қонунист, дигаре "соҳибкор". Онҳо метавонистанд ба мансабдорон ва вакилон фишор оранд, ба корхонаҳои давлатӣ ҳамла кунанд. Ҳоло чунин падида вуҷуд надорад. Фақат кӯшиш кунанд, сар бардоранд, ҳамон замон пора - пора карда мешаванд", - гуфт Тошиев.
Ба гуфтаи ӯ, солҳои пеш таъсири аъзои гурӯҳҳои муташаккили ҷиноӣ дар кишвар бузург буд.